حقوق اليهود بين الانكار و الاهمال

ملحوظة: علشان الناس فى الديكتاتوريات دايما متعودين على الاحكام المسبقة و سرعة الحكم على الاخرين و العيشة كأنهم الهة تأمر و تنهى… انا مختلف تماما مع كل الدول القومية و الدينية و العرقية و ضد الدول اساسا. و انا عارف ان مش كل ضحايا الهولوكوست كانوا يهود فقط, لكن كان اغلبهم.

اولا انا كنت مبسوط جدا ان يوم 15, كنت بتكلم مع ناس فى قمة التسامح و تقبل الاختلاف و التفتح. لكن الصدفة انى فى نفس اليوم قابلت ناس تانية فى قمة التعصب القومى لارائهم الشخصية و معتبرينها حقايق مطلقة, و كل هدفهم من مناقشة الناس انها تنسخهم نسخة منهم و يبقى الحوار من اتجاه واحد من عندهم, و على المتلقى السمع و يقول ”امين“.

المناقشة ابتدت لما كنت بقول لواحد من صحابى على انهم فى قمة السطحية انهم بيركزوا بس على اللى الاعلام بيقوللهم عليه عن الكوسة اللى اتعملت لابن الريس, و بيتجاهلوا ان الاعلام مش بيجيب لهم سيرة ولاد اللى فى المخابرات و قيادات الجيش!

اللى كان بيتكلم مع صاحبى, غير انه ماكانش مهتم يسمعنى, هاجمنى و قال انه مش بيعتمد على مصدر واحد للمعلومات, لكن فى نهاية اليوم اكدلى العكس تماما.

واحد تانى كان حاضر الحوار, و كان معايا صورة لواحد من ضحايا مخيمات التكثيف (concentration camps), و كان بيستهين بوحشية و ظلم الهولوكوست.

انا اللى جننى فى الموضوع هو الاستهانة بحدث فاق كل الحدود فى الظلم و ان دة بيهدد بتكرار احداث مشابهة. الشخص دة كان بيقول ان التعويضات اللى المانيا بتديها لضحايا الهولوكوست اليهود (المدنيين), انها صفقات بين الدول, و ان فيه ناس تانية, زى الجنود اسرى الحروب (العسكريين), ماتت بطرق مشابهة فى حروب. صاحبى كان موافق على الجزء الاخرانى, بس انا كنت بفهمهم انهم بيخلطوا حاجات كتير ببعض, و الحالتين مأسويين, كل الحروب جرايم و كل الحروب بيحصل فيها ما يسمى ”جرايم حرب“ (war crimes), لكن فى الهولوكوست, ناس مدنيين مالهاش علاقة بالحروب ماتت فى مناطق ماكانتش مناطق حرب (war zones), و دة فرق مهم جدا و دة من اهم الاسباب فى وحشية الحدث.

المهم ان الشخص دة جابلى صاحبه الاولانى, جابهولى علشان يعرفوا يمارسوا الهجوم و الtrolling, و كانت مناقشة فى قمة السفسطة, ماعندهمش حتى استعداد يسمعوا الجملة لاخرها, هما مؤمنين بحاجات و مش هيسكتوا الا لو قولتلهم انهم هما صح 100% و انى غلطان, و واحد منهم كان معتبرنى مجنون علشان كنت بوضحله انكاره لحقايق تاريخية, من اهمهم ان كان فيه ممالك يهودية على شرق سينا. انا كنت مصدوم لما لقيتهم الاتنين بيرددوا پروپاجاندا دول الجامعة العربية فى ان عمر ما كان فيه وجود لليهود فى المنطقة دى و ان وطن اليهود هو مصر القديمة و ان انجلترا هى اللى جابت لليهود ارض العرب علشان العرب ضعفاء و طيبين و ينفع تتسرق حاجتهم بسهولة. الصدمة كانت بالنسبالى كبيرة لأنى تقريبا من يوم ما وعيت على السياسة و عرفت ان فيه اسرائيل, كنت عارف ان زمان جدا كان فيه دول يهودية موجودة مكان اسرائيل الحالى. دول حتى ماكانوش عارفين اصل كلمة ”فلسطين“ انه من اسم شعوب كانت عايشة فى منطقة غزة و حواليها, و ان كل دول مالهمش علاقة بالعرب او القومية العربية!

الغريب انهم كانوا بيقولوا على اليهود, ناس ”جت من برا“ و مالهمش حق. طيب, ما كوكب الارض كل الناس اللى فيه بتهاجر و بتسافر و بتيجى من حتت ماكانتش اصلا مستقرة فيها. و كل الدول ليها شروط علشان تقبل المهاجرين ليها, اشمعنا هما مش بتحصلهم حالة استثارة من شروط الهجرة الظالمة و العنصرية ساعات, بتاعة كل الدول, و متضايقين فقط من ان دولة اسرائيل ليها شروط للى عايز يهاجر و يستقر فيها؟! دة طبعا غير ان فيه احداث كتير عملها البشر, و مافضلش حاجة منها فى التاريخ. و علماء التطور (evolution) بيقولوا اصلا ان كلنا كبشر اصلنا جة من جنوب شرق قارة افريقيا و استوطنا معظم سطح الكوكب.

طيب, اقوللكم على حاجة كمان تفرس, الاتنين اللى كانوا بيدافعوا عن دول الجامعة العربية, اللى كانوا محسسينى انى بخرجهم عن عقيدتهم و بسلخهم عن جلدهم, هما من الاقليات المضطهدة فى دولة جمهورية مصر ”العربية“!

مواضيع مرتبطة:
* DW: سوفى و هانز شول, رمز المقاومة (السلمية)
* Mark Halawa: اسأل حلاوة: هل كان هناك بلد عربي اسمه فلسطين؟

Advertisements

Comment

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s